Les mots surlignés font l'objet d'une note
1Reçue à Montélimar, le 31 juillet 1573. Répondue le 02 août 1573.
2Monsieur de Gordes, je suis attendant en bien bonne devotion la resolution que ceulx de
3mon païs de Daulphiné auront prise après avoir entendu les articles qui ont esté
4accordez à ceulx de La Rochelle, tant pour eux que autres mes subgectz qui ont tenu leur
5parti, vous asseurant que je serois bien aise quilz se resolussent à se prevaloir
6de la grace et misericorde de laquelle jay desliberé user en leur endroict sans me
7contraindre à user de la force pour me faire rendre lobeissance quilz me doibvent ; au moien
8de quoy je desire que vous soiez assisté et favorisé des forces tant de cheval
9que de pied que je vous ay cidevant mandé mectre sus, aiant à ceste cause
10advisé vous envoier, comme je fais presentement, ledict et lettres de commission necessaires
11pour le recouvrement de la somme de trente mil livres, faisant ce que je vous ay
12escript par mes dernières, vous priant, monsieur de Gordes, si tost que ledict
13edict aura esté publié en ma court de parlement de Dauphiné et par tout ailleurs
14où besoing sera, faire au plus tost procedder au recouvrement desdits trente mil livres,
15tenant main que les commissaires que jay commis pour faire les ventes et allienations
16necessaires soient obeyz et assistez de tout ce quil sera possible, affin que plus
17dilligemment ilz puissent recouvrer ladite somme, laquelle vous regarderez à
18mesnager le plus soigneusement que faire ce pourra, affin que, par votre bon
19mesnage, ceste depence puisse estre departie par tout, mesmes à lendroict de
20ce qui peult estre deub à la gendarmerie qui a servy près de vous, dont vous
21me manderez de voz nouvelles, priant Dieu, monsieur de Gordes, vous avoir en sa sainte
22garde. Escript à St Germain, ce XXIIIIe jour de julliet 1573
23Charles
24de neufville secretaire